രാജ്ദൂത് എന്ന വളർത്തു മൃഗം.!!

-----------------------------------------------

ഒരു പഴയ രാജ്ദൂത് ബൈക്ക് ഉണ്ടായിരുന്നു , എന്റെയൊരു മരപ്പണിക്കാരൻ ചങ്ങാതിയ്ക്ക്.!!

അവൻ, നാലു പൊറോട്ടയുടെ കാശിന്‌, എന്നോ വാങ്ങിയതാണ്‌.! ബുക്ക്, പേപ്പർ, ഇൻഷുറൻസ് തുടങ്ങിയ ആർഭാടങ്ങൾ ഒന്നുമില്ല.!!
ലൈറ്റ് ,ഹോൺ, ബ്രേക്ക് തുടങ്ങിയ അനാവശ്യങ്ങളുമില്ല.!!
അവനു ലൈസൻസ്സുമില്ല.!!!

ആകെയുള്ളത് , എന്റെ ചങ്ങാതി, സ്വന്തം കൈ കൊണ്ട്
പ്ലാവിൻ തടിയിൽ നിന്നും കടഞ്ഞെടുത്ത, ഗദ പോലിരിക്കുന്ന ഒരു സാധനമാണ്‌.! അത് നട്ടുബോൾട്ട് ഇട്ട് , ക്രാഷ് ഗാർഡായി വണ്ടിയിൽ പിടിപ്പിച്ചിട്ടുണ്ട്.!!!

വണ്ടിയാണെങ്കിൽ , ചില തറവാട്ടിൽ പിറന്ന നായയെ പോലെയാണ്‌. അവൻ വിളിച്ചാലേ ഓടൂ, സ്റ്റാർട്ട് ആകൂ. നില്ക്കൂ എന്നൊക്കെ വലിയ നിർബന്ധമായിരുന്നു വണ്ടിയ്ക്കും.!!

ഒരു ചക്രം വലത്തോട്ടും, ഇനിയൊരു ചക്രം ഇടത്തോട്ടും കോടിയാണ്‌ ഇരിയ്ക്കുന്നത്. ഫലത്തിൽ.. റോഡിൽ ഒരു കുഴി കണ്ടാൽ വണ്ടി നേരെ ഓടിക്കണം. വളയ്ക്കരുത്.!!
ഒരു ചക്രം കുഴിയുടെ വലതും , മറ്റേത് ഇടതുമായ് കടന്നു പോയി, വണ്ടി കുഴിയിൽ ചാടാതെ പോകും.!!

ഒരു ദിവസം, കവലയിൽ വച്ച് ട്രിപ്പിൾസ്സ് സഹിതം രാജ്ദൂതിനെ പോലീസ്സു പിടിച്ചു.!!!

കാല്കുലേറ്ററിൽ കണക്കു നോക്കിയപ്പോൾ,ഏകദേശം 3500 രൂപ പിഴ അടയ്ക്കണം..

സ്റ്റേഷനിൽ വന്ന് കാശടച്ച് വണ്ടി എടുത്തോളാൻ പോലീസ്സേമാൻ ഉത്തരവിട്ടു.!!!

ഇതു കേട്ടതും, എന്റെ ചങ്ങാതി ഒന്നു പുഞ്ചിരിച്ചു. ''ശരി... വണ്ടി സാറ്‌ കൊണ്ടക്കൊ.. ഞാൻ വരാം'' എന്നും പറഞ്ഞ് കൈയ്യും കെട്ടി നില്പ്പായി..!!!

പോലീസ്സുകാരൻ പഠിച്ച പണി പതിനെട്ടും നോക്കിയിട്ടും രാജ്ദൂത് സ്റ്റാർട്ടാകുന്നില്ല..!!!ജീപ്പിലുള്ള സകല പോലീസ്സുകാരും ഇറങ്ങി വന്ന് അവരവരുടെ കയ്യൂക്ക് പ്രയോഗിച്ചു നോക്കി. നോ രക്ഷ.!!
ചില നാട്ടുകാരും, ഒന്നു ശ്രമിച്ചു നോക്കി. അതും നോ രക്ഷ..!!

അവസാനം, പോലീസ്സുകാരൻ അടവു മാറ്റി.

''3500 ഇവ്ടെ അടച്ച് പൊക്കൊ''.. എന്നായി..!!!

അതിന്‌ ,കൂട്ടുകാരന്റെ മറുപടി കേട്ട് പോലീസ്സുകാരൻ ആദ്യം ഒന്നു ഞെട്ടി..!!

''ന്റെ സാറെ..ഇതുമ്മെ വെല ഒള്ള ആകൊരു സാനം.. ആ പ്ലാവും കഷ്ണാ..!! ഒരു നൂറുവ്വ്വ ഇങ്ങട് തന്ന്ട്ട്, വണ്ടി സാറന്നെ എട്ത്തൊ''..!!.

ആ ഞെട്ടൽ, പിന്നീടൊരു പുഞ്ചിരിയായി.!! മീശയുടെ തുമ്പ് പിരിച്ച് SI വരെ ചിരിച്ചു..!!! 'ബു ഹു ഹു'..!!

''നിന്ന്യൊന്നും പർഞ്ഞിട്ട് ഒരു കാര്യല്ലടാ.. ഇതിനിം കൊണ്ട് നീ വേം വീട്ടീപ്പൊക്കൊ'' എന്ന് SI പറഞ്ഞതും,

ഒറ്റയടിക്ക് രാജ്ദൂത് സ്റ്റാർട്ടാക്കി ചങ്ങായി പറന്നു..!! പോലീസുകാർ, ആരാധനയോടെ അവന്റെ പോക്കും, രാജ്ദൂതിന്റെ കട്ടപ്പുകയും കണ്ടു നിന്നു..!!

പുണ്യാളനു കിട്ടാത്ത മെഴുകു തിരി..!!!✝

-----------------------------------------------------

വർഷങ്ങൾക്കു മുൻപ് ഒരു ദിവസം , എട്ടാം ക്ലാസ്സിലെ ഫിസിക്സ് പിര്യഡ്.

ഞാനടക്കമുള്ള സകലരും, പേടിച്ചു വിറച്ച് കണ്ണും തള്ളി , വായും തുറന്ന് ഇരിപ്പാണ്‌.!

സ്കൂളിനു മുൻപിലുള്ള പള്ളിയിൽ, കുന്തവും പിടിച്ച് കുതിരപ്പുറത്തിരിക്കുന്ന സെയിന്റ് ജോർജ്ജ് പുണ്യാളനെ , എനിക്ക് വ്യക്തിപരമായ് അടുത്തറിയാവുന്നതു കൊണ്ട് കയ്യോടെ.. ഒരു മെഴുകു തിരി, ഞാൻ രണ്ടു മിനിറ്റു മുൻപ് നേർന്നിരുന്നു..!!!

ക്ലാസ്സിൽ, ഇന്ന് ചോദ്യോത്തരമാണ്‌. അതും.. ഒരു വഹ അറിയാത്ത ഫിസിക്സ്.! യാതൊരു ദയാ ദാക്ഷണ്യവുമില്ലാതെ ഞങ്ങളെ പൊതിരെ തല്ലുന്ന ടീച്ചറാണ്‌ ക്ലാസ്സ് നയിക്കുന്നത്.!

ആർക്കാണ്‌ നറുക്കു വീഴുന്നത് എന്ന് ഒരു പിടിയുമില്ല.!! ടീച്ചർക്കു തോന്നിയ പോലെ ആരോടു വേണമെങ്കിലും , ഇതു വരെ പഠിപ്പിച്ച ഭാഗങ്ങളിൽ നിന്നും, ഏതു ചോദ്യവും ചോദിക്കാം..!!

ഉത്തരം.. കടുകുമണിക്ക്, ഒന്ന് അങ്ങോട്ടോ, ഇങ്ങോട്ടോ തെറ്റിയാൽ....ഞമ്മളും ഇഞ്ചനും, തവിട് പൊടി..!!

എല്ലാവരും ശ്വാസമടക്കിപ്പിടിച്ച് ഇരിയ്ക്കുകയാണ്‌. ഒരു സൂചി നിലത്തു വീണാൽ കേൾക്കാം എന്നു പറയുന്ന , ഒരു വക പേടിപ്പിയ്ക്കുന്ന നിശബ്ദത.!!!

ടീച്ചർ ടെക്സ്റ്റ് ബുക്ക് തുറന്നു. ഏതോ ഒരു പേജ് തുറന്നു കണ്ണോടിച്ച് , ആദ്യത്തെ ചോദ്യം ഒരു ഹതഭാഗ്യനു നേരെ എറിഞ്ഞു..!!!

ഞങ്ങൾ എല്ലാവരും, കണ്ണുകൾ കൊണ്ട് ആ സഹപാഠിയ്ക്ക് ആദരാഞ്ജലികൾ നേർന്നു..!!!

ഉത്തരം പറയാൻ കടമപ്പെട്ടവൻ , മുകളിലേക്ക് നോക്കി ഉത്തരത്തിലെ ഓട് എണ്ണി നില്ക്കുകയാണ്‌. ഇടയ്ക്കിടെ ഇന്നസെന്റ് നോക്കുന്നതു പോലെ ഞങ്ങളേയും നോക്കുന്നുണ്ട്.! ഒന്നും പറയുന്നില്ല. അറിഞ്ഞാലല്ലേ പറയൂ..?

ലവന്റെ , ആ പ്രകടനം കണ്ട് , ടീച്ചർ പുസ്തകം മേശയിൽ വച്ചു. ഇടതു കയ്യിലെ വാച്ച് പതിയെ ഊരിയെടുത്ത് അതും മേശയിൽ വച്ചു..!!

ഒറ്റയടിക്ക് , രാജവെമ്പാല പോലും ചത്തു പോകുന്ന ജാതി, ഒരു വടി മേശയിൽ നിന്നെടുത്ത് , ഒരു തിരക്കുമില്ലാതെ പതിയെ ഓട് എണ്ണുന്ന ആ മഹാന്റെ അടുത്ത് നടന്നെത്തി ശാന്തയായ് പറഞ്ഞു.!!

''ഊം.. കൈ നീട്ട്''.

അവൻ വലം കൈ നീട്ടി. കണ്ണുകൾ അപ്പോളും ഓടിൽ തന്നെ..!!

ടീച്ചർ അടി തുടങ്ങി ..!!! 'വൂ..ഷ്......' 'ട്ടാ'...

ഇങ്ങനൊരു ആറെണ്ണം ഞാൻ എണ്ണി.! തല്ലു വാങ്ങിക്കൂട്ടുന്നവൻ, 'മ്മേ.. ഈ'.. എന്നൊക്കെ വിവിധ കാളർ ട്യൂണുകൾ ഉപയോഗിക്കുന്നുണ്ട്.!!

അവന്റെ ക്വോട്ട കഴിഞ്ഞു. ടീച്ചർ വീണ്ടു ടെക്സ്റ്റ് ബുക്ക് കയ്യിലെടുത്തു..!!അടുത്ത ചോദ്യം ദിപ്പൊ വരും..!!!
ഞാൻ പുണ്യാളന്റെ മെഴുകുതിരി, ഒരെണ്ണം കൂടി കൂട്ടി ഓഫർ കൊടുത്തു..!!!

ടീച്ചർ ചോദ്യം ചോദിയ്ക്കാൻ തുനിഞ്ഞതും, വാതില്ക്കൽ ഒരു വിളി..!!!

''ടീച്ചറേ''.......!!

പ്യൂൺ രവി ചേട്ടനാണ്‌. എന്തോ അറിയിപ്പുമായ് വന്നതാണ്‌..!!!

''ആ...പച്ചക്കറി വിത്ത് വാങ്ങാൻ പേരു കൊടുത്തിട്ടുള്ള പിള്ളേരോടൊക്കെ വരാൻ പറഞ്ഞു.!! ഒരു ചെറിയ ക്ലാസ് ഉണ്ടാകും. അതു കഴിഞ്ഞാൽ വിത്തു വിതരണം''..!!

അതു കേട്ടതും , സന്തോഷം കൊണ്ട് എന്റെ കണ്ണു നിറഞ്ഞു..!!
'യുറേക്കാ..... പുണ്യാളാ...!! ഞാനും പേരു കൊടുത്തിട്ടുണ്ട്. വെണ്ട വിത്തും, പയറു വിത്തും വാങ്ങാൻ'. വെണ്ട കൃഷി ചെയ്താൽ തല്ലു കിട്ടില്ലെന്ന് , ആദ്യമായ് ഞാൻ മനസ്സിലാക്കി..!!

വതില്ക്കൽ വന്നു നില്ക്കുന്ന രവി ചേട്ടന്റെ കയ്യിൽ, ഒരു കുന്തവും, അടിയിൽ ഒരു വെള്ളക്കുതിരയും തെളിഞ്ഞു വന്നു. പുണ്യാളന്റെ ഓരോ കളികൾ..!!

ഞങ്ങൾ, ഏകദേശം എട്ടുപേർ പരോൾ തടവുകാരെപ്പോലെ നിഷ്കളങ്കമായ് പുഞ്ചിരിച്ചു കൊണ്ട് വിത്തു വാങ്ങാൻ , ക്ലാസ്സിനു പുറത്തിറങ്ങി..!!

പച്ചക്കറി കൃഷി ചെയ്യാൻ മനസ്സില്ലാതെ , വെറുതേ തല്ലു വാങ്ങിക്കുട്ടാൻ പോകുന്ന പാവങ്ങളെ ഓർത്ത് എനിക്കു ചിരിപൊട്ടി..!!

എന്റെ ചിരി തീർന്നതും , ടീച്ചറുടെ ഡയലോഗ് എത്തി..!!

''കൃഷിക്കാര്‌ പോകാൻ വരട്ടെ, എല്ലാവരോടും പെട്ടന്ന് ഓരോ ചോദ്യം ചോദിച്ചു വിടാം. ഉത്തരം പറഞ്ഞിട്ടു പൊക്കൊ...''!!!

സകല കൃഷിക്കാരും, ആഞ്ഞു ഞെട്ടി..!! ഞാൻ പുണ്യാളനെ മനസ്സിൽ തെറി വിളിച്ചു.!!

ടെക്സ്റ്റ് നോക്കാതെ, ഒരേ ഒരു ചോദ്യം മാത്രം ടീച്ചർ ചോദിച്ചു. ഒറ്റ കർഷകർക്കും ഉത്തരം അറിയില്ല..!!!

ടീച്ചർ ,നേരം കളയാതെ കർഷകരെ വരിവരിയായ് നിർത്തി ഒരു ചെറിയ വെടിക്കെട്ട് നടത്തി.!!! ട്ടേ..ട്ടേ..ട്ടേ...!!!
ആ..കെ ഒരു വെടിയും ,പുകയും മാത്രം ഓർമ്മയുണ്ട്..!!

പുകയടങ്ങിയതും ടീച്ചർ, ''ഇനി പോയി പച്ചക്കറി വിത്ത് വാങ്ങിച്ചൊ''..!!

''ഇനി എന്തൂട്ട്ണാ പച്ചക്കറി വിത്ത്.? കിട്ടീല്യേ''..? എന്നും പറഞ്ഞ്, കൂട്ടത്തിൽ ഒരുത്തൻ, അകത്തു കയറി ബഞ്ചിൽ ഇരിപ്പായി.!

അടി കൊണ്ട് ,ഇലയില്ലാത്ത ചാമ്പയ്ക്കാ മരം പോലെ ചുവന്നു തുടുത്ത എന്റെ സുന്ദരമായ കൈ നോക്കി ഞാനും, മറ്റുള്ളവരും വിത്തു വാങ്ങാൻ നടന്നു..!!

സ്കൂൾ വിട്ടു പോകും നേരം, ദൂരെ നിന്ന് പള്ളിമുറ്റത്തുള്ള പുണ്യാളനെ ഒന്നു ദയനീയമായ് നോക്കി. 'എന്നാലും, ന്റെ പുണ്യാളാ..? യു റ്റൂ..'.?

ചുക്കുണ്ട അപ്പാപ്പൻ.!

*******************************
ഒരു കാലത്ത് , എന്റെ തലമുറയിലെ കുട്ടികളുടെ ജീവിതത്തിന്റെ ഭാഗമായിരുന്ന ഒരാളുണ്ടായിരുന്നു.!!!

അപ്പാപ്പൻ.!! അദ്ദേഹത്തിന്റെ ഈ പേരുമാത്രമേ മിക്കവർക്കും ഇന്നും അറിയൂ.!! പക്ഷേ, ആ പേരു മാത്രം മതി, ഇന്നും അപ്പാപ്പനെ ഓർക്കാൻ..!!!

ഞാനൊക്കെ അപ്പാപ്പനെ കണ്ടു തുടങ്ങിയ കാലത്തു മുതൽ , അവസാനം കാണുന്നതു വരെ, ഒരു മാറ്റവുമില്ലായിരുന്നു.! ഉയരവും, വണ്ണവും, കുറവ്. കൈയുള്ള വെള്ള ബനിയനും , മുണ്ടും വേഷം. കഴുത്തിൽ ഒരു കറുത്ത ചരടിൽ കൊരുത്തിട്ടിരിയ്ക്കുന്ന ക്രിസ്തുദേവന്റെ ചിത്രം.!!
ഇത്രയേ ഉള്ളൂ അപ്പാപ്പൻ.!!!

സ്കൂളിനു മുൻപിൽ , കറുത്ത ചായമടിച്ച കിളിക്കൂടു പോലൊരു വളരേ ചെറിയ മാടക്കട നടത്തിയിരുന്ന അളാണ്‌ അപ്പാപ്പൻ.!!
എന്നും , മുടിഞ്ഞ തിരക്കാണ്‌ കടയിൽ.!! കസ്റ്റമേഴ്സ് കൂടുതലാണെങ്കിൽ, സഹായത്തിന്‌ അപ്പാപ്പന്റെ ഭാര്യ അഥവാ അമ്മാമ്മയും കടയിൽ ഉണ്ടാകും..!!

അപ്പാപ്പന്റെ കടയിൽ വിലപിടിപ്പുള്ളതൊന്നുമില്ലായിരുന്നു..!! അന്ന് , അമ്പതു രൂപ റെഡി ക്യാഷ് കയ്യിലുണ്ടെങ്കിൽ, അപ്പാപ്പന്റെ കട മൊത്തം വാങ്ങാം. അതിനുള്ള സാധങ്ങളേ കടയിൽ വില്പ്പനയ്ക്ക് ഉണ്ടായിരുന്നുള്ളൂ..!!

ചെറിയ കുറച്ച് പ്ലാസ്റ്റിക് കവറുകൾ , ചാക്കു ചരടിൽ കൊരുത്ത് ഇട്ടിട്ടുണ്ടാകും. ഒരു പലകയിൽ രണ്ടുമൂന്നു ചില്ലു ഭരണികളും.!!! അതിലെല്ലാം, രുചിയൂറുന്ന വിവധയിനം മിഠായികളായിരുന്നു..!!!!

ഇരുപതു പൈസാ തുട്ടിന്റെ രൂപവും വലിപ്പവും , മണ്ണിന്റെ നിറവുമുള്ള ഒരു ഐറ്റം ഉണ്ടായിരുന്നു. പിട്ട് എന്നാണ്‌ അതിന്റെ പേര്‌.വർണ്ണിയ്ക്കാൻ കഴിയാത്ത ഒരു തരം പ്രത്യേക രുചിയായിരുന്നു പിട്ടിന്‌. ഒന്നിന്‌ 10 പൈസയായിരുന്നു വില.!!

10 പൈസ കൊടുത്ത് രാവിലെ ഒരു പിട്ടു വാങ്ങിയാൽ പിന്നെ,,, ഉച്ച വരെ തിന്നാം.!! കടിച്ചാലും പൊട്ടില്ല. അലിയുകയുമില്ല എന്നതായിരുന്നു പിട്ടിന്റെ മാഹാത്മ്യം.!!

പിന്നത്തെ പ്രധാനിയായിരുന്നു ചുക്കുണ്ട.!!
പേരു പോലെ തന്നെ, ചുക്കും അരിപ്പൊടിയോ/ ഗോതമ്പു പൊടിയോ ചേർത്ത് ഉണ്ടാക്കുന്ന, ചെറിയ ഉണ്ടയാണ്‌ ചുക്കുണ്ട.!! ഒന്നിന്‌ ഒരു പൈസ. 10 പൈസക്ക് 10 ചുക്കുണ്ട. 1രൂപയ്ക്ക് നൂറു ചുക്കുണ്ട.!!! ഹോഹ് ഭയങ്കരം...!!!
അന്നത്തെ കാലത്ത് , ഒരു രൂപയൊക്കെ രൊക്കം മറിയ്ക്കാൻ പാടായിരുന്നു. എന്നാലും , ചില പ്രമാണികളായ കൂട്ടുകാരുടെ കൂടെപ്പോയി ഒരു രൂപയ്ക്ക് ചുക്കുണ്ട വാങ്ങാറുണ്ടായിരുന്നു..!!!

വലം കയ്യിൽ നിന്നും ഇടം കയ്യിലേക്ക് പകർന്ന് , ചുക്കുണ്ടയിൽ നിന്ന് കണ്ണുകൾ മാറ്റാതെ , അപ്പാപ്പൻ 100 എണ്ണിക്കഴിയുമ്പോളേയ്ക്കും ഏകദേശം 15 മിനിറ്റാകും.!! ചിലപ്പോൾ രണ്ടാമതും എണ്ണി നോക്കും..!!
ആ നേരമത്രയും, ഞങ്ങൾ ഉമിനീരിറക്കി വായും പിളർന്ന് നില്ക്കും..!!!

ചില തല തെറിച്ചവന്മാർ, (വല്ലപ്പോളും ഞാനും) എണ്ണുന്നതിനിടയിൽ അതുമിതും ചോദിച്ച് അപ്പാപ്പനെ ആകെ കൺഫ്യൂസാക്കും.!! എണ്ണം ആകെ തെറ്റും..!!
'നീയൊന്നും കണക്കിലാവില്യടാ'എന്നു പ്രാകികൊണ്ട്, അപ്പാപ്പൻ ഒരു വിധം എണ്ണിത്തീർക്കും..!!
എണ്ണം തെറ്റി മൂന്നാലു ചുക്കുണ്ടകൾ ഫ്രീയായ് കിട്ടിയ സംഭവങ്ങളുണ്ട്.!! അതിനാണ്‌ എണ്ണുന്ന നേരത്ത് അപ്പാപ്പനെ വട്ടാക്കുന്നത്..!!!

100 ചുക്കുണ്ട എന്നു പറഞ്ഞാൽ, എന്റെ ബട്ടൻസ്സില്ലാത്ത നീല ട്രവ്സ്സറിന്റെ രണ്ടു കീശയിലും നിറച്ച് ഇടാനുള്ള മൊതലുണ്ടാകും..!! അതിങ്ങനെ ഓരോന്നിങ്ങനെ തിന്നു തിന്നും, ചുക്കുണ്ട വാങ്ങാൻ ഗതിയില്ലാത്തവന്റെ മുഖത്തു നോക്കി, ചുക്കുണ്ട 'ക്ടും' എന്ന് കടിച്ച് പൊട്ടിച്ചുമൊക്ക കഴിഞ്ഞു പോയത്, ഒരുപാടു വർഷങ്ങളായിരുന്നു..!!!

പല്ലൊട്ടി, തേനിലാവ്, ഉണ്ടമ്പൊരി, പുളി മുട്ടായി എന്നിങ്ങനെ, 10 പൈസ ബജറ്റിൽ ഒതുങ്ങുന്ന ഒരു പാട് സാധങ്ങൾ അപ്പാപ്പന്റെ കടയിൽ ഉണ്ടായിരുന്നു..!!
പക്ഷേ..'കോടികളുടെ' ബിസിനസ്സ് നടന്നിരുന്നത് ചുക്കുണ്ടയിലും, പിട്ടിലുമായിരുന്നു..!!!

കാശിനു പകരം ,നേരേ ചൊവ്വേ കണ്ണുകാണാത്ത അപ്പാപ്പന്‌ ഇരുമ്പിന്റെ വാഷർ കൊടുത്തു പറ്റിച്ചിരുന്നു ചിലർ..!!
വഞ്ചനയല്ല.!! ചുക്കുണ്ട തിന്നാനുള്ള കൊതി കൊണ്ട്.!!!

പിന്നീട് വർഷങ്ങൾക്കു ശേഷം എന്നോ... ഒരു ദിവസം അപ്പാപ്പന്റെ കടയും, അപ്പാപ്പനും അപ്രത്യക്ഷമായി..!!
വികസനം വന്നുവത്രെ.!! അതിന്റെ ഭാഗമായ് അപ്പാപ്പന്റെ കടയെടുത്ത് ദൂരെയെറിഞ്ഞു..!!!
ഒന്നു രണ്ടു തവണ, എന്നോ പിന്നെയും അപ്പാപ്പനെ വഴിയരികിൽ കണ്ടിരുന്നു. അവശനായിരുന്നു അപ്പാപ്പൻ.!! വർഷങ്ങൾക്കു മുൻപ് മരിച്ചു പോയെന്നും പിന്നീടറിഞ്ഞു...!

ആപ്പിൾ , മൈക്രോസോഫ്റ്റ് എന്നൊക്കെ പറയുന്നതു പോലെ , ഒരു ബ്രാൻഡ് നെയിമായിരുന്നു അപ്പാപ്പൻ..!!
ഇന്നും , അപ്പാപ്പന്റെ ചുക്കുണ്ട എന്നു പറഞ്ഞാൽ , അതിനോടു കൂട്ടിപ്പറയാൻ ആയിരം കഥകൾ ഉള്ളിൽ സൂക്ഷിച്ചു വച്ചിരിയ്ക്കുന്ന നൂറുകണക്കിനു ആളുകൾ പലയിടങ്ങളിലുമുണ്ട്..!! ഈ പോസ്റ്റിനു താഴെയും ചിലർ വന്നേക്കാം.!!

പത്തു പൈസക്ക് പകരമായ്, അപ്പാപ്പൻ ബാക്കി വച്ചിട്ടു പോയത്... ഇത്തരം ചില മധുരമുള്ള ഓർമ്മകളാണ്‌.!!
അന്ന്... പറയാനുള്ള വിവരവും, ബോധവും ഇല്ലായിരുന്നു.!! അതിന്നു പറയുന്നു.!! ലവ് യൂ അപ്പാപ്പാ..!!!